Богородице Дево, надеждо всем концем земли, Заступнице рода христианскаго ! Пред честною иконою Твоею благодеяния отцем нашим воспоминающе вси мы к Тебе прибегаем и из глубины сердца усердно вопием: о премилосердная Царице Небесная, паче матерския любве нас, недостойных чад Твоих, возлюбившая! Ты видиши, яко плача и рыданий достойно есть нынешнее житие наше, и до конца от невидимых и видимых врагов в путь погибели преходит. Ибо вси мы от твердыни закона Бога нашего отвергохомся и в лености и маловерии изнемогаем, яко сын блудный, на страну далече от пути правды Его заблудихом и о спасении нашем радим. Несть мира, несть любве в серцах наших, и тмою грехов многих ослепили мы духовныя очи свои. О Пренепорочная и Пречистая Владычице, Благая Мати издревле вернаго народа Твоего, ныне безмерными падении низу поверженнаго! Вси мы, грешнии и непотребнии раби Твои, в стенании сердца нашего , воздыханиих горьких и покаянии нелицемернем к Тебе яко последней помощи и отраде нашей, прибегаем и неотступно Тебе зовем. Воспомяни веру и молитвы отец наших, не отвергнись от нас, но воздвигни из глубины греховныя и от тяжкой пленицы беззаконий свободи. Всеисцельную силу Твою низпосли, стеною покрова Твоего нас, в беде и отчаянии сущих, огради и во правой вере и делании заповедей Христовых утверди. Облецы ревностию и святынею пастырей наших, дух их, во еже прилежати доброму деланию в винограде сем, возбуди, и обращение веры и братскаго друг о друге попечения в стаде Христовом насади и возрасти. Резсеянныя собери, унывающее сердце наше любовию и умилением согрей и всех нас единомыслие и истину приведи, заблуждших же от Православной веры отступльших братий наших вразуми и во единение Святыя Церкве, яко спасительнаго для ковчега, возврати. Скорбящия и во искушениих сущия умудри и подкрепи, озлобленныя умири, юныя направи, сирыя, убогия и вся бедствующия ризою Твоею честною защити. О Всесильная Владычице, радосте всех скорбящих и страждущих, дивная Помощнице люте обуреваемых ! Услыши нас, услыши, молим Тя, вонми стенаниям и рыданиям многим несчастных чад Твоих, зле ныне погибающих. Посети милостию Твоею братий наших, во гладе и болезнех смертных сущих, лютыя нужды их утоли и от всяких злых обстояний избави. Буди всем, притекающим к Тебе, верная помощь, утешение и благоотишное пристанище от всяких бурь и напастей многомятежныя нашея жизни: Ты бо еси больных исцеление, скорбящих терпение и отрада, заблуждших и соблазняемых вразумление и на пути правды утверждение. Приими зде приносимыя моления наша и вознеси их к Престолу Всевышняго, яко да Твоим предстательством ограждаеми и всемощным покровом Твоим милостивно осеняеми и соблюдаеми, в благодарении сердца нашего прославим всегда победители нас творящаго Бога и Тебе, о наше по Бозе благодатное упование, ныне и присно, и во веки веков. Аминь.